Riksteatret: ubesvart anrop

Ein knapp månad etter terrorangrepa 22. juli skal Rebekka ta til på vidaregåande. Ho kjenner ingen av dei som døydde, og tenkjer at ho burde klara å ta kvardagen tilbake. Ho prøver å engasjera seg i revyen, i Daniel med det krøllete håret, i festar og skule og vener. Problemet er berre at ho tenkjer på det heile tida.

«Ubesvart anrop» handlar om å leita etter meining i møte med det meiningslause. Om kor vanskeleg det kan vera å nå ut til kvarandre, og kor viktig det er når me får det til. Stykket er også ei historie om venskap som held, og om at det finst vegar tilbake!

Når Riksteatret dramatiserer Nora Dåsnes sin prisløna teikneserieroman 15 år etter 22. juli, er målet å gje unge menneske håp og hjelp til å forstå eiga uro i møte med ei uroleg verd.

Maja Christensen, frå NRKs ungdomssuksess «Rådebank», spelar hovudrolla. Menneska rundt henne vert spelt av Amina Mohamud, Jawad Aziz, Arjan Nilsen og Christina Sleipnes.