Øyhoppingsparadiset lengst vest i Norge

Start reisa di med utgangspunkt i Bergen. Du kan ta ekspressbåten til Rysjedalsvika eller følgje E39 til Lavik og vidare utover mot vakre Hyllestad – ytst på nordsida av Sognefjorden. Her ventar eit variert landskap med både rolege naturperler og storslagne fjellformasjonar, rik kulturhistorie og ekte vestlandsidyll.

Familieopplevingar og hageidyll

Hyllestad byr på opplevingar for både små og store. Ta med familien til Indrefjord Gard, der du kjem tett på dyr og dyreliv i landlege omgjevnader – ei flott oppleving for både store og små nysgjerrige sjeler.
Senk tempoet og nyt rolege sommardagar i den frodige og stemningsfulle Hjertebladhagen hos Merete. Her, i eit landskap fylt av grønt liv og fuglesong, får du ein pause frå kvardagen. Det er eit av dei stille romma i naturen – der det er godt å berre vere.

Reis tilbake i tid – i fotspora til vikingar og steinbrytarar

Hyllestad er kjent for si unike kvernsteinsproduksjon – ein industri som vart driven i nesten 1000 år og sette sitt preg på både landskap og samfunn. I Kvernsteinsparken kan du vandre mellom dei største steinbrota frå vikingtida og mellomalderen i Skandinavia. Her får du sjå spora etter det harde handverket som forma historia – med havet og fjella som kulisse.

For den eventyrlystne – Lihesten ventar

Vil du ha ei av dei råaste fjellopplevingane i regionen, må du setje kursen mot Lihesten. Dette dramatiske og karakteristiske fjellet reiser seg som ein monumental vegg mot himmelen og har blitt eit ikon for både turgåarar og fotografar. Med mange ulike ruter og stiar kan du bruke alt frå ein ettermiddag til fleire dagar på å utforske Lihesten – frå bratte ryggar med luft under føtene, til rolege dalføre med utsikt over fjordlandskapet.

Naturopplevingar for alle

Du treng likevel ikkje gå i bratt terreng for å få store naturopplevingar. Hyllestad har også fleire lett tilgjengelege turstiar som byr på spektakulær utsikt over fjord, fjell og hav. Desse turane passar perfekt for deg som ønskjer å ta det med ro, men likevel vil oppleve det beste av vestlandsnaturen.

I Solund, lengst vest i landet, kjem du tett på både naturen og kystkulturen - ei oppleving som sit i både kropp og sjel.

I Solund ventar eventyra: padling mellom 1700 øyar, holmar og skjer, villsausafari i kystlandskapet, levande kysthistorie og om sommaren kan du oppleve høgdepunkta – Fyrsafari til Utvær og Øyhopping med den populære postbåten mellom Solund, Bulandet og Værlandet. Når du har utforska Solund eit par dagar, går turen vidare med postbåten til Bulandet.

Etter ei uforgløymeleg ferd med postbåten frå Solund, ventar nye eventyr på to hjul. I Bulandet er du bokstaveleg talt heilt vest i landet – og her startar sykkelturen din gjennom dei vestlegaste bebudde øysamfunna i Noreg: Bulandet og Værlandet.

Visste du at øyriket består av heile 365 øyar, holmar og skjer – eitt for kvar dag i året? Her kan du nyte rolege dagar fylt med små opplevingar og store utsyn. Vandre til Gjørøylykta og kjenn havbrisen, ta bilde av dei populære kamskjella, og stopp for god mat på ein av dei trivelege serveringsstadene langs ruta. Landskapet er ope, vilt og vakkert – eit perfekt bakteppe for sykkelturen.

Vil du bestige Alden, også kalla Den Norske Hest kan du ta kontakt med ein av dei lokale overnattingsstadene – dei hjelper gjerne med å organisere skyss til fjellet.

Når du er klar for neste etappe, tek du ferja frå Værlandet til Askvoll – og reisa di held fram med nye naturopplevingar og kulturmøte i hjartet av FjordKysten.

Ferga frå Værlandet til Askvoll er meir enn berre transport – det er ei oppleving i seg sjølv. Under overfarten kjem du tett på det ikoniske fjellet Alden, Den Norske Hest, som reiser seg bratt opp frå havet. Du glir forbi Brurastakken, eit fjell som skil seg ut med sitt stripete skjørt i svart, kvitt og grønt – eit geologisk kunstverk du seint gløymer. Og med litt flaks får du kanskje sjå grindekval eller andre skapningar som krysser fjorden, i sitt rette element.

Vel framme i Askvoll opnar det seg ei verd av opplevingar – både for deg som vil nyte stillheita, og for deg som vil ut og utforske.
Ta turen til Atløy og bestig Brurastakken frå land – ein tur med storslått utsikt og fascinerande geologi. Besøk den idylliske bygda Holmedal, der den verdskjende Helle Knivfabrikk held til – og der handverk og natur går hand i hand.
I Rivedal står statuen av Ingolf Arnarson, vikingen som grunnla den første busetnaden på Island – ei mektig påminning om kysten si rolle i norrøn historie.

Vil du ut på tur, kan du ta beina fatt opp til Blåfjell, med panoramautsikt over fjord, fjell og hav. Er du meir i kulturmodus, ventar to flotte kulturvandringsløyper – éi i Askvoll sentrum, der du følgjer i fotspora til kunstmålaren Anders Askevold, og ei anna i Stongfjorden, som tek deg med gjennom pionertida til norsk industri.

Og når dagen går mot kveld, kan du lene deg tilbake med ein softis ved sjøen hos Askvoll Sjøbuer Mat og Drikke, medan du ser båtar sige stille forbi i kveldssola.

Frå fjord til byliv ved havet – opplev Florø

Etter nokre fine dagar i Askvoll går ferda vidare med ekspressbåten til Florø – Noregs vestlegaste by, der kystkultur, storhav og småbypuls møtest. Her, heilt ute ved kanten av havet, ventar ei levande bykjerne omringa av spektakulære øyar og fjordar – og eit landskap som byr på opplevingar heile året.

Ein by tufta på havet og kulturen

Florø har ei sterk tilknyting til havet og historia. Byen byr på eit aktivt kulturliv med lokale festivalar, konsertar og arrangement gjennom året. Eit besøk til Kystmuseet gir deg eit levande innblikk i den maritime historia og kystfolkets liv gjennom tidene – ein fin introduksjon til regionen sitt særpreg.

Øyperlene utanfor byen

Florø er inngangsporten til eit heilt øyrike. Ta turen til den dramatiske øya Kinn, der du kan sjå den ikoniske Kinnaklova – eit naturleg skår i fjellet som danner ein majestetisk silhuett mot himmelen. Klova har mellom anna vore kulisse i storfilmen Dune, og er eit populært turmål med historie og utsikt i skjønn forening.

På den frodige øya Svanøy ventar ein heilt annan stemning. Her har både adel og biskopar hatt sete gjennom tidene, og i dag kan du oppleve Norsk Hjortesenter, der du kjem tett på majestetiske hjortar i sitt naturlege habitat.

Ei natt du seint vil gløyme

For ei heilt spesiell overnatting, reis til øya Reksta og bu i ei av dei unike Birdbox-hyttene – små designhytter med store vindauge og spektakulær utsikt. Her kan du sovne til lyden av havet og vakne med naturen rett utanfor dørstokken.

Reisa langs vestlandskysten held fram – frå Florø kan du ta Kystvegsekspressen eller ekspressbåten til Måløy, og sjølve turen er ei oppleving i seg sjølv. Her kjem du tett på naturkreftene – frå blikkstille hav og gyllent strandliv, til dramatiske bølger og storm som slår mot fyrvegger. Dette er kysten slik den verkeleg er – rå, vakker og levande.

Måløy – der havet formar alt

I Måløy har nærleiken til havet sett sitt tydelege preg – både på landskapet, næringslivet og folket. Her ventar kontrastfylte opplevingar. Like utanfor sentrum finn du den krittkvite Refviksanden – ei 1,5 km lang perle av ei strand, rekna som ei av Noregs finaste badestrender. På fine dagar er det eit paradis for barnefamiliar og badeglade – og eit perfekt stopp for deg som vil nyte stillheita med tærne i sanden.

Eit lite stykke frå sentrum ligg Vågsberget, ein gamal handels- og gjestgjevarstad som fortel historia om kystens liv og ferdsel. Og i fjæra i nærleiken finn du Kannesteinen – den ikoniske, stettforma steinen som i tusenvis av år har blitt forma av bølgene og vêr og vind. Eit av dei mest fotogene motiva langs kysten.

Eventyr og adrenalinkick i havgapet

For deg som vil ha meir fart og spenning, kan Måløy Adventure tilby ei rekke aktivitetar – frå havrafting til opplevingsbaserte turar i området. Vil du padle mellom holmar og skjer, eller prøve deg på coasteering – der du klatrar, hoppar og sym langs kysten – er Sjøbris Adventure rette plassen. Her blir du møtt av erfarne guidar og ekte kystglede.

Og etterpå? Slapp av i saunaen og nyt utsikta over det majestetiske kystlandskapet – ein perfekt avslutning på ein dag fylt med salt, sol og store inntrykk.