Rivalisering på og utanfor bana

I boka Red on Red skriv sportsjournalistane Phil McNulty og Jim White om kvifor innbyggarane i byane Liverpool og Manchester misliker kvarande på kryss og tvers av generasjonar, klasse, kjønn og etnisitet.

Denne konflikten er i stor grad driven fram av rivaliseringa mellom fotballklubbane Manchester United og Liverpool FC, og gjennom ti legendariske fotballkampar og møte både med veteranar som Alex Ferguson, Kenny Dalglish, Steven Gerrard og Gary Neville og med tilhengarar, dommarar og ei rekke andre involverte får vi innblikk i korleis og kvifor konflikten har utvikla seg.

Phil McNulty frå Liverpool og Jim White frå Manchester har samarbeidd om boka, og dei møtest til samtale med journalist og fotballkommentator Øyvind Alsaker.

Etter samtalen blir det tid til spørsmål frå salen.