Nært og ekte
Vanylven ligg mellom Stad og Ålesund, og passar perfekt inn i ei rundreise på Nordvestlandet. Her er det kort veg frå by til bygd og frå fjord til fjelltopp. Mange kjem for naturen – men blir verande litt lenger fordi det også gir ro. I bygdene langs fjorden finn du god plass, venlege folk og landskap du ikkje gløymer.
Turar som gjer inntrykk
Fotturen opp Hakalletrappene ved Åram gir både høg puls og vid utsikt. Sherpa-trinna leier deg oppover mot fjell og fjord, og belønninga ventar på toppen med ei fantastisk utsikt mot storhavet.
Ved Sandvik-sanden på Åheim finn du ei av dei vakraste badestrendene på Sunnmøre – langgrunn og barnevennleg, med havet som næraste nabo. Og i bygdene rundt kan du padle på stille fjordar, gå på fjellryggar eller berre rusle i fjæra. Her er det lett å finne sitt eige tempo – og sin eigen plass.
Bygdene med utsyn
Fiskå, Syvde, Åheim, Rovde, Åram og Eidså – Vanylven er delt opp i små grender og bygder, kvar med sitt uttrykk og sitt landskap. Nokre vender seg mot fjella, andre opnar seg mot havet. Det er her du kjem tettast på kvardagen, på stilla – og på dei ekte møta.
På Åheim møter industri og natur kvarandre langs elva og ved dei gamle olivinbrota. I Syvde ligg fjorden stille mellom bratte dalsider, og på Rovde har du utsyn over fjordkryss og fjelltoppar. Det er eit område du ikkje berre ser – men kjenner, pustar og tek med deg vidare.
