Viggo Venneløs - Ulsteinvik

Viggo Venn står midt mellom latter og alvor – med hjartet utanpå kostymet og eit glimt i auga. I Viggo Venneløs utforskar han det vakre i det rare og det rare i det vakre. Gjennom dansesteg du ikkje visste fanst, musikk du ikkje visste du trong og fysisk humor som treff rett i hjarterota.

Vesten er av. Dette er ei framsyning full av latter, rørsle og varme – for vaksne som både vil le og kjenne etter.

Viggo Venn er ein norsk komikar, klovn og fysisk teaterkunstnar – kjend for si særegne blanding av absurditet, sårbarheit og publikumsnær humor. Han fekk sitt internasjonale gjennombrot då han vann Britain’s Got Talent 2023, med den ikoniske refleksvesten sin og ei uforutsigbar energi som trollbatt både publikum og dommarar.

Viggo er utdanna ved École Philippe Gaulier i Paris – den legendariske klovneskulen som òg har fostra komikarar som Sacha Baron Cohen, Emma Thompson og Helena Bonham Carter. Han har tidlegare arbeidd som sjukehusklovn i Noreg, og har undervist i klovning og fysisk komedie rundt om i Europa.

Før Viggo Venneløs har han skapt og turnert med ei rekkje kritikarroste framsyningar – både solo og i duoen Zach & Viggo, som vann Best Comedy Award på Brighton Fringe 2016 og Adelaide Fringe 2017. Han har òg vore finalist i Das Supertalent (Tyskland), finalist i New Acts of the Year Show (London), og opptrådd på Royal Variety Performance framfor den britiske kongefamilien i Royal Albert Hall (2023).

I Viggo Venneløs vender han tilbake til teaterscena – utan vest, men med hjartet fullt.