Terje Sporsem og John Brungot: Høy og Mørk / Storfjord Kulturhus

To av Noreg sine mest populære komikarar har slått seg saman med eitt mål for auget: Å gje deg eit skikkeleg morosamt show! Og DET trengst når verda går meir og meir av hengslene.

Høy og Mørk er ei framsyning spekka med standup, musikk og parodiar, og vi kan love at latteren sit laust når John og Terje tek føre seg tema som høge, mørke maktsjuke leiarar, beredskap, generasjonskonfliktar og frykta for plutseleg å vere den eldste i familien.
Kvifor vil nokon endre verda etter fylte 75? Var livet mindre komplisert på 80- og 90-talet? Og kan ein late som gjennom det meste i livet? Terje og John tek føre seg nokre av dei store og viktige spørsmåla i livet – men òg ting du ikkje visste at du trong svar på.

Gjer deg klar for ein kveld spekka med masse latter og god stemning!

John Brungot er ein av Noregs mest ettertrakta humoristar, og har lang og brei røynsle frå både scene, TV og film. Han har vunne prisen Årets TV-komikar under Komiprisen, og har vore med i humorprogram som Torsdag kveld fra Nydalen, Nårje og Søstrene ser på TV. John har òg vore programleiar for fleire store TV-suksessar. For tida er John å sjå i Humoretaten på NRK.

Terje Sporsem er ein av landets mest folkekjære standup-komikarar, og har sett opp fleire soloshow som har fått toppkarakterar, og som framleis blir viste jamleg på NRK. Han har òg ein lang TV-karriere bak seg, har vore programleiar for ei rekkje program, og har gjort seg bemerka som deltakar i fleire populære konsept. Han har fått Stå opp-prisen, og har fleire gongar vore nominert til Komiprisen. Terje feirar 30 år som komikar i 2026.