Vandreturen til Gjørøylykta tek deg heilt ytterst i Bulandet, i ope og vêrutsett kystlandskap. Fyrlykta ligg 22 meter over havet og markerer innseglinga mot øyriket, med vid utsikt over hav, holmar og skjer. Turen går i lett til moderat terreng og følgjer stiar og ope landskap langs kysten.
Like ved løypa kan du også besøkje det store kamskjellet - eit særprega landemerke og populært fotopunkt i Bulandet. Undervegs får du nærkontakt med naturen og det rike fuglelivet som pregar området. Dette er ein fin tur for deg som ønskjer ei kort, men innhaldsrik vandring, kombinert med opplevingar i øysamfunna Værlandet og Bulandet.
Turen kan enkelt kombinerast med sykling, øyhopping eller andre kystopplevingar i området.
