Halsnøy er blant anna kjend for Halsnøy Kloster. Augustinarklosteret sto ferdig i 1164. Ruinane frå klosteret er i dag museum og del av Sunnhordland Museum. På klosteret er det ulike kulturarrangement gjennom året. Like ved klosteret er det flotte turvegar og ei kulturløype.
Vest for klosteret finn du faktisk vegen Verdens Ende.
Sentrum på Halsnøy er landbyen Sæbøvik. Her er det naturlege samlingspunktet SPAR Sæbøvik. Det er både gåvebutikkar, bakeri og kulturhus på Sæbøvik. Den populære båthamna Sæbøvik gjestehamn er ein naturleg stoppestad for båtturistar om sommaren. Her er det også bubilparkering.
På Halsnøy kan du overnatte i feriehus eller hytter. Mange av desse har også båtar tilgjengeleg, slik at du kan kombinere ferien med fisketurar på fjorden. Øya har mange fine turmål, både korte og litt lengre turar.
Halsnøy er landfast med resten av Kvinnherad kommune via Halsnøytunellen. Denne er gratis å kjøre gjennom. Husnes sentrum ligg 15 minuttar frå Halsnøy.
Øya buktar seg nesten som ein S, og på dei smalaste stadene kan ein sjå sjøen på begge sider. Frå vest til aust på øya er det ca 17 kilometer, og i kvar «ende» av øya er det ferjestø; Ranavik og Sydnes.
Fjelbergøya og Borgundøya er dei næraste naboøyene til Halsnøy.
