På sykkel i Hyllestad

Hyllestad i Vestland er ein perfekt destinasjon for sykkelturar i spektakulær fjordnatur, med stille vegar, variert terreng og panoramautsikt over fjord og fjell. Dette er eit flott område for både korte dagsturar og lengre sykkelferiar. Her finn du etappeforslag for sykkeltur i Hyllestad.

Reis kollektivt til Hyllestad

Frå Bergen kan du enkelt reise kollektivt med ekspressbåt til Rysjedalsvika. Med utgangspunkt i Rysjedalsvika startar sykkelturen vidare langs Fv62 mot Indrefjord Gard, på rolege vegar med fjorden tett på. Her finn du autentiske gardsopplevingar med dyr, hestetilbod og moderne fasilitetar i naturskjønn omgjevnader. Bli med på guida ridetur, vær cowboy for ein dag, få ridetimer eller berre nyt dagen med dei flotte dyra på garden.

Etter ein dag på Indrefjord Gard syklar du tilbake til Rysjedalsvika og mot Hotel Sognefjord i Leirvik. Hotellet ligg heilt nede ved sjøkanten, og er eit perfekt stopp for ein matpause eller overnatting. Har du meir energi igjen etter dagen kan du ta ein spasertur opp til grillhytta på Øvre Heggebø, spele frisbeegolf på Haukås Frisbeegolfbane og avslutte kvelden med ein tur i saunaen.

Etter ein innhaldsrik første dag syklar du vidare mot Dale, gjennom eit kulturlandskap der fleire av dei imponerande gamle steinbruene langs den historiske Trondhjemske postveg framleis står som vitne om tidlegare ferdsel. Like ved finn du den flotte Fossfossen. Etter om lag tre kilometer tek du av til venstre mot Hyllestad. Her ventar ei jamn stigning på rundt 1,2 kilometer, før vegen slepp taket og du kan rulle ned mot bygda.

Opplev Kvernsteinsparken

I Hyllestad er det sterkt tilrådd å ta ein pause ved Kvernsteinparken, eit unikt friluftsmuseum med omvisingar og aktivitetar i perioden juni til august. Har du lyst til å strekke litt ekstra på beina, kan du følgje ei merka kulturvandringsløype, der du via mobilen får høyre personlege forteljingar om korleis det var å vekse opp i Hyllestad på 1950-talet.

Hyllestad er ei vakker bygd, forma av fjorden og det majestetiske fjellet Lihesten, og her finn du òg butikk og servicetilbod.

Sykle mot Åfjorden og overnatt på Sognhostel som tilbyr rimeleg og enkel overnatting. Ønskjer du å overnatte i telt er dette også mogleg her.

Topptur til Lihesten

Sognhostel blir ein god base for dei neste dagane, med rolege omgjevnader og kort veg til store naturopplevingar. Herfrå er det lett å ta dagsturar ut i landskapet rundt, og eitt av høgdepunkta er ei fjelltur i det markante fjellmassivet Lihesten. Lihesten er eitt av dei mest karakteristiske landemerka i Fjordkysten og Sunnfjord, og eit populært turmål som byr på storslått utsikt over fjord, øyar og hav.

Ro og påfyll i Hjertebladhagen

Etter ein dag i fjellet kan neste dag setjast av til ro og påfyll i Hjertebladhagen. Denne heilt spesielle hage- og interiørbutikken, skapt av Merete, byr på ei oppleving utanom det vanlege. Her kan du nyte ein god kopp kaffi og nysteikte vaflar i den vesle hagekaféen, rusle mellom blomar, urter og grønsaksvekstar, og la deg inspirere av salsvarene som er integrerte i det frodige hagemiljøet.

Set deg ned på ein av dei mange sitteplassane i hagen og nyt utsikta over fjorden, dufta av blomstrande plantar og synet av frodig vekst. Stemninga er still og fredeleg - ofte er det berre fuglesong og summing frå insektlivet som bryt stillheita, kanskje akkompagnert av lyden frå ein båt på veg ut mot havet.

Tilbake på Sognhostel kan du senke skuldrene og nyte kvelden i rolege omgjevnader. Lag deg ein god middag eller kveldsmat på kjøkkenet, og nyt måltidet med utsikt mot fjorden. Etterpå kan du slappe av i hengkøya og la blikket kvile over det vakre fjordlandskapet.

For dei som har lyst på litt sosialt samvær, har Sognhostel både brettspel og biljard tilgjengeleg for gjestene – perfekt for ein avslappa og triveleg kveld.

Fjelltur til Hesjetinden og dagsturhytta Sørefjordhytta

Er beina friske og klare for nye fjellturar, kan vi anbefale ein tur til Hesjetinden via Sørefjordhytta. Start med å sykle til Akse, der fotturen tek til.

Frå Akse er det naturleg å kombinere turen med eit stopp ved dagsturhytta Sørefjordhytta, eit triveleg pausested med flott utsikt. Turen opp til dagsturhytta tek om lag ein halvtime. Herfrå går stien vidare mot toppen av Hesjetinden, og også denne etappen tek rundt ein halvtime.

Turen byr på fine naturopplevingar og gir ei flott avslutning på ein aktiv dag i området.