Nordfjordeid ligg vakkert til midt i Nordfjord. Bygda har ei rik historie som strekker seg tilbake til vikingtida, og er i dag eit levande kultursentrum med opera, rockefestival og fleire historiske stader. Her møter du vikingskip, fjordhestar og operahus på same dag.
Natur og landskap
Nordfjordeid er omkransa av fjell og frodige landskap. Frå den vakre Eidsgata, med sine gamle trehus, kan du sjå ut over fjorden og dei grøne fjellsidene som strekker seg innover. Eidselva renn roleg gjennom bygda – ei lakseelv med lange tradisjonar for sportsfiske. Frå sentrum kan du gå topptur opp til Trollnykjen. Her får du flott utsikt utover fjorden. Berre elleve kilometer frå sentrum ligg Harpefossen skisenter, som tilbyr alpinbakkar og store område for frikøyring om vinteren.
Aktivitetar
Nordfjordeid byr på fleire fine vandreturar i sentrum og i nærområdet. Her kan du rusle gjennom den idylliske Eidsgata med sine historiske trehus eller gå langs den vakre lakseelva. Ein folkefavoritt for små og store er turen til Dagsturhytta på Naustdalskamben og fotturen til Lottstøylen. Denne idylliske setra er som eit postkort frå ei svunnen tid og du får ei vakker utsikt over Nordfjorden.
For dei som vil ut på fjorden, tilbyr lokale aktørar RIB-turar og kajakkutleige. Nordfjordeid er også kjent for Norsk Fjordhestsenter – det nasjonale kompetansesenteret for fjordhesten. Her kan du oppleve Noregs nasjonalhest på nært hald, ri på panoramaturar med utsikt over bygda og dalen. Dersom veret ikkje spelar på lag kan du ta heile familien med på ei spennande klatrereise i Noregs einaste Vikingkrigar-rom på Hamna Aktivitetssenter.
Kultur og historie
Nordfjordeid er eit av dei viktigaste historiske stadane i Nordfjord. På Sagastad Vikingsenter kan du stige om bord i Myklebustskipet – ei gjenbygging av det største vikingskipet som nokon gong er funne i Noreg. Senteret har interaktive utstillingar, VR-opplevingar og gir eit fascinerande innblikk i vikingtida.
Kvar sommar vert den vesle bygda forvandla når Malakoff Rockfestival tek over. Med over 20 000 besøkande og ein av landets største festivalcampar, er dette ein av dei største festivalane på Vestlandet. Resten av året byr Operahuset Nordfjord på konsertar, teater og opera i verdsklasse – eit hus som har sett Nordfjordeid på kartet som viktig kulturaktør.
