Topp 10 ting å gjøre i Askvoll

1. Øyhopping i havgapet – opplev Værlandet og Bulandet

Vest for Askvoll ligg eit av Noregs mest unike øyrike – Værlandet og Bulandet, det vestlegaste bebudde samfunnet i landet. Her ligg øyane som perler på ei snor, knytte saman av seks vakre bruer og ein svingete veg på 11 kilometer – ein køyretur i seg sjølv verdt reisa.

Dette er ein draumedestinasjon for deg som likar å vere aktiv i naturen. Ta sykkelen fatt, padle mellom øyane, fisk frå svaberga eller legg ut på ein fottur med utsikt rett ut i storhavet. Det er noko heilt eige med å sykle frå Værlandet til Bulandet – gjennom eit landskap der havet møter himmelen og kvardagen glir sakte forbi.

2. Bestig Alden - Den norske hest

Midt i havgapet reiser Alden seg bratt og majestetisk – som eit mektig symbol på kysten. Fjellet, som vert kalla Den Norske Hest, stig heile 481 meter rett opp frå havet og er synleg på over 100 kilometers avstand. Det er ikkje utan grunn at dette er eitt av dei mest kjende seglingsmerka på Vestlandet.

Turen opp er ei oppleving i seg sjølv, og når du står på toppen, ventar ei utsikt som tek pusten frå dei fleste – eit 360-graders panorama over fjordar, øyar og ope hav så langt auga rekk. Alden er ikkje berre eit fjell – det er ei oppleving du seint vil gløyme.

Lurar du på korleis du kjem deg til Alden?

Les meir om dette i lenka under

3. Kulturvandring i Askvoll

Legg ut på ei vandring gjennom Askvoll sentrum og bli kjend med historia til ein av bygda sine mest kjende søner – kunstmålaren Anders Askevold. Gjennom ei digital kulturvandring blir du teke med tilbake i tid, til landskapet og miljøet som inspirerte dei stemningsfulle motiva hans.

Med mobilen i handa og kulturvandring.no opna, får du tilgang til lyd og bilete som fortel historia undervegs. Løypa går innom ti utvalde punkt, alle med tilknyting til Askevold sitt liv og virke, og tek om lag ein time. Ei fin oppleving for både kunstinteresserte, historieglade – eller deg som berre vil sjå Askvoll med nye auge.

4. På to hjul gjennom historia – opplev Atløy med sykkel

Atløy er ei perle for deg som likar å oppleve landskapet i ditt eige tempo. Ta med sykkelen og start turen frå Gjervik kai – herifrå ventar 11,6 km med vakre vegar, idylliske kulturlandskap og spennande stoppestader på vegen mot Herland.

Eit av høgdepunkta er den særprega trekyrkja på Vilnes, bygd i 1674, som vitnar om lange tradisjonar og sterk kulturhistorie. Men Atløy har meir å by på enn historie – det er også eit eldorado for turgåarar og naturentusiastar. Syklar du vidare mot Brurastakken, kjem du til eit fjell som skil seg ut med sitt karakteristiske stripemønster i svart, kvitt og grønt – som eit skjørt sydd av naturen sjølv.

Brurastakken er ikkje berre vakker – han er også ein geologisk skatt. Her finn du spor etter tre ulike fjellkjedefoldingar, og det er laga ei eiga geologiløype som startar om lag 2 km frå Herland. Turen opp til toppen er merka og gir deg både utsikt og innsyn i ei unik geologisk historie – eit ekte eventyr for både turgåarar og geologiinteresserte.

5. På sykkel mellom fjord og fjell – landevegstur i Askvoll

Opplev Askvoll frå sykkelsetet og la deg begeistre av dei svingete, rolege landevegane som snor seg gjennom vakker vestlandsnatur. Ruta frå Stongfjorden til Askvoll tek deg langs Eidsfjorden, der fjorden speglar fjella og kvar sving byr på nye inntrykk.

Turen passar perfekt for deg som ønskjer å kombinere aktivitet med naturnære opplevingar i eit landskap som både er rått og fredfullt.

6. Holmedal – frå vikingar til handverk av verdsklasse

I den idylliske fjordbygda Holmedal finn du ei verdskjend perle for handverksinteresserte – Helle knivfabrikk. Her blir knivar av høg kvalitet laga med inspirasjon frå naturen rundt: fjell, fjordar og ope hav. Knivane frå Helle har vore ein del av norske turtradisjonar i generasjonar, og i fabrikkutsalet kan du både lære meir om historia og sikre deg eit ekte stykke vestnorsk handverk.

Ikke langt unna, i Rivedal, står ei mektig påminning om regionen si rolle i vikinghistoria: statuen av Ingolf Arnarson – vikingen som grunnla den første busetnaden på Island. Her kan du stå ved fjorden og sjå for deg korleis han la ut på si ferd over havet, med røter djupt planta i denne delen av kysten.

7. Kulturvandringsløype i Stongfjorden

Visste du at Stongfjorden var ein av dei aller første industristadene i Noreg? Denne vesle fjordbygda spelte ei stor rolle i starten på norsk industrireising, og det kan du utforske gjennom ei stemningsfull kulturvandringsløype.

Løypa er 1,2 km lang og tek deg med gjennom bygda si industrielle arv, med ni stopp som fortel historia om alt frå kraftverk og aluminiumsverk til kvardagsliv og samfunnsutvikling. Her får du eit nært møte med både dei store linjene og dei små detaljane – alt medan du går i fotspora til dei som forma framtida til fjordbygda.

8. Topptur med utsikt – Blåfjell 533 meter over havet

Lyst på ein fjelltur med panoramautsikt over fjord, fjell og øyar? Då er Blåfjell nord for Askvoll eit perfekt val. Med sine 533 meter over havet byr fjellet på ei passe utfordrande rute og ei spektakulær utsikt som belønning på toppen.

Turen kan startast frå Askvoll sentrum eller frå parkeringsplassen ved Askvoll Øvre. Dei første 800 meterane deler du sti med ruta mot Sandvika, før du tek av og passerer skoggrensa etter om lag 500 meter. Derifrå ventar ope og vakkert fjellterreng heilt opp til toppen – eit ideelt mål for deg som vil ha ei kort, men minnerik turoppleving.

9. Blegja – dronninga av Sunnfjord

Med sine 1305 meter over havet ruvar Blegja som eit majestetisk landemerke – stolt kalla dronninga blant fjella i Sunnfjord. Dette er ein tur for deg som søkjer ei ekte utfordring og ei uforgløymeleg naturoppleving.

Turen til toppen er krevjande, men løna er stor: Når du står på det høgaste punktet i Askvoll kommune, får du ei utsikt som tek pusten frå deg. Her opnar det seg eit panorama over heile Vestlandet – frå djupe fjordar og kvasse fjell til glitrande isbrear, øyrike og ope hav. På klare dagar kan du sjå milevis i alle retningar – og kjenne på ei kjensle av å stå på taket av verda.