Loen er ei lita og idyllisk bygd inst i Nordfjorden som byr på opplevingar i verdsklasse. Her finn du Loen Skylift, ein av verdas brattaste gondolbanar, Via Ferrata Loen med Europas lengste via ferrata-bru, og Lodalen – ein av Noregs vakraste dalar.
Natur og landskap
Loen er omkransa av høge fjell med kvite toppar som reiser seg rett opp frå den sølvblanke Nordfjorden. Innover opnar Lodalen seg kor det smaragdgrøne Lovatnet ligg som eit spegel mellom bratte fjellsider, fossefall og vakker natur. Vatnet får den spesielle fargen frå brepartiklar som elvane frå Jostedalsbreen fører med seg.
Inst i Lodalen finn du Kjenndalsbreen, den lågastliggjande brearmen av Jostedalsbreen. Langs vatnet ligg den sjarmerande setra Breng, ei fråflytta seter som i dag er ein populært stoppestad. Høgt over bygda ruvar Skåla (1848 moh.), Noregs lengste motbakke der turen startar på berre 30 moh.. På toppen kan du overnatte i Skålatårnet og Skålabu.
Aktivitetar
Loen Skylift er ein spektakulær gondolbane som på berre fem minutt tek deg frå fjordnivå til toppen av Hoven, 1011 meter over havet. På toppen finn du merka stiar, zipline og Hoven Restaurant med ei spektakulær panoramautsikt. For dei som vil ha meir utfordring, er Via Ferrata Loen eit høgdepunkt. Klatrestien tek deg langs fjellsida til toppen av Hoven, og undervegs kryssar du Gjølmunnebrua – Europas lengste via ferrata-bru på 120 meter, 750 meter over havet.
I Lodalen ventar ein haug av aktivitetar både på land og på vatn. Her kan du gå fotttur, sykle, symje, eller padle kajakk og SUP på det smaragdgrøne Lovatnet. Frå Rake og Oppheim startar fleire fine turar med fantastisk fjordutsikt, blant anna den populære turen til Rakssetra.
Loen Active tilbyr guida kajakk- og fjellturar, sykkelutleige, SUP og mykje meir. Om vinteren byr Hoven på toppturar, trugeturar og Noregs lengste akebakke i eit vakkert vinterlandskap.
Kultur og historie
Lodalen ber på ei dramatisk historie. I 1905 og 1936 rasa store fjellstykke frå Ramnefjell ned i Lovatnet og skapte flodbylgjer som øydela gardane Nesdal og Bødal. Til saman mista 135 menneske livet. Lodalsulukka er ei av dei største naturkatastrofane i norsk historie, og minnene lever framleis sterkt i bygda. Ei historisk vandring gjennom dalen gir eit gripande innblikk i denne historia.
Skålatårnet på toppen av Skåla vart bygd i 1891 av distriktslege Hans Henrik Gerhard Kloumann, opphavleg som eit sanatorium – rekreasjon for kropp og sjel i frisk fjellluft. Tårnet er i dag ei av dei mest kjende DNT-hyttene i Noreg. Frå Breng seter, som har historie tilbake til 1340, kan du sjå korleis seterdrift og gardsliv var i gamle dagar. Hotel Alexandra har teke imot gjester sidan 1884 og er eitt av Noregs mest tradisjonsrike hotell.
