Frå fjord til fjell – og alt mellom
Valldal strekkjer seg frå fjorden og opp i fjella, midt mellom Trollstigen og Geiranger. Her får du både kvilepuls og adrenalin – året rundt. Du kan padle på fjorden, klatre i bratte lier, gå toppturar med utsikt til verdsarvlandskapet, eller ta steget utfor Zakariasdammen – ei utfordring på 96 meter. Dette kontrastfylte terrenget rommar både Reinheimen nasjonalpark og ikoniske stopp langs Nasjonal turistveg Geiranger - Trollstigen, som Gudbrandsjuvet, der elva har grave seg inn i fjellet og laga eit landskap som både rører og ruskar.
Menneske, minne og gamle vegar
Valldal har vore ei viktig ferdselsåre i hundrevis av år – mellom fjord og fjell, mellom bygder og dalar. Valldal er òg startpunkt for pilegrimsleia Valldalsleia – ei rute der du bokstaveleg talt går i spora etter dei som kom før. Landskapet opnar for ettertanke, og historia er synleg både i stiar, setrar og kvardagsliv. Tafjord er og ein del av Geirangerfjorden verdsarvområde og eit godt utgangspunkt for turar i Tafjordfjella. Her finn du òg Fundergata – ein gamal bygdeveg der det særprega gatemiljøet med kyrkjebuder, stover og gamleskulen eit levande minne om livet som var.
Smaken av Valldal
Takka vere det milde klimaet er Valldal kjend som jordbærbygda – men det veks meir enn berre bær her. Om sommaren kan du kjøpe frukt, grønsaker og søte jordbær rett frå gardane langs vegen. Smaken av Valldal kjem rett frå jorda – og landskapet du står i.
Opplev bygdene rundt
Rundt Valldal ligg fleire bygder og små tettstader som kvar for seg byr på unike opplevingar. Du kan besøkje Herdalssetra med 300 år samanhengande seterdrift, gå på ski i Arena Overøye, vandre i nasjonalromantiske landskap eller oppleve rosemåla prakt i Rosekyrkja. Frå fjordfiske til fjellturar, frå freda husmannsplassar til lokale mattradisjonar – her finn du det ekte, nære og varierte.
