«Nivået på skikøyringa til folk varierer mykje. Difor er det bra å ha guide. Guiden sørgjer for at gjestene får den beste skikøyringa tilpassa sitt nivå,» seier guide Oscar Almgren. Han og dei andre guidane kan fjellområda inn og ut, og veit både korleis ein kjem best til klassikarane, og kva skjulte perler dei kan vise fram til deg og turfølgjet ditt. «Iblant trur folk ein må vere ekspert for å vere med. Det er absolutt ikkje tilfelle,» legg Oscar til.
Pudderparadis med fjordutsikt. Toppturar på Sunnmøre
Vinter, vår, haust
Sist oppdatert: 05.02.2024
© Håvard Myklebust
Når «nordvesten» kjem inn over fjella på Sunnmøre legg snøen seg som pudder over landskapet, og gjer om heile regionen til eit gedigent leikeland for dei skiglade.
I meir enn ti år har Oscar drive Uteguiden. Firmaet tilbyr opplevingar mellom dei djupe fjordane og spisse tindane i regionen. «Ein guide veit akkurat kva som skjer og når det skjer,» seier Oscar. Han fortel at han og dei andre guidane gjerne planlegg og legg til rette for fleire opplevingar enn berre tur på ski. Guidane kjenner ikkje berre naturen og vêret. Dei kjenner også kulturen, regionen og maten i området.
Desse kan syne deg vegen
Skikøyring nær byen, med fjordutsikt
Det er lett å forstå at fjellområdet på Sunnmøre blir kalla Sunnmørsalpane. Dei skyt rett opp frå havet og fjorden, og i spisse tindar. Nær den vakre byen Ålesund, der du kan fly rett inn til Vigra, ligg fleire moglegheiter til å stå på ski og sjå på fjorden samtidig.
Det største og mest kjende skianlegget er Strandafjellet Skisenter. Her kan du stå på ski midt i fjordlandskapet. I nabobygda, Sykkylven, finst også nokre skjulte skiperler i morosamt terreng for både den utrygge og den erfarne skikøyraren.
Midt i Sunnmørsalpane
Du kan også fly rett til Ørsta/Volda. Her er det mange moglegheiter til toppturar, for nybyrjaren, utfordraren og proffkøyraren. For den vågale kan du også vere deltakar på den årlege ekstremsportfestivalen X2 der frikøyringskonkurransen er høgdepunktet. Området trekkjer også til seg fleire skiglade menneske under festivalane Sunnmørsalpane Skifestival, Stranda Skifestival og Hjørundfjord Skifestival.
Med skisenter, toppturar nær bygdene og ikkje minst den storslåtte Hjørundfjorden er området ein god base for å leike seg med ski i fjella. Det er også moglegheiter til Ski & Sail på Hjørundfjorden eller å ta Hjørundfjorden Haute Route over ei heil veke. Det er fleire tilbydarar av Ski & Sail, blant anna Explore 62 North og Sunnmøre Adventure.
Alpepass – ni gongar så mykje snø
Det er fleire alpinsenter i regionen, for dei dagane du ikkje har guide på tur. Det varierte terrenget og klimaet gjer at det alltid er eit skisenter med god snø rundt ein fjelltopp og inn ein fjord. Med eit Alpepass kan du besøke heile ni skisenter i regionen med eitt einaste skikort.
Sov godt mellom toppturane
Det er mange høve til å sove godt i fjordbygdene og fjellgrendene på Sunnmøre. Ved Strandafjellet har du fleire alternativ til overnatting, både hotell, hytter og flotte leilegheiter. Midt mellom Sunnmørsalpane ved Hjørundfjorden kan du velje mellom sjarmerande hotell tett på fjorden eller meir sentralt beliggande i Ørsta.
Overnatting i Sunnmørsalpane
Fleire opplevingar på Sunnmøre
Heile Sunnmøre byr på fleire opplevingar. Både Jugendstilbyen Ålesund og Geiranger er verdt ein omveg ein dag du ikkje susar nedover fjellsidene i Sunnmørsalpane.