Toppen av Bømlo
Siggjo er det høgaste fjellet på Bømlo, der toppen ligg 474 m.o.h. Frå mange stader i Sunnhordland kan du sjå fjellet, som i tidlegare tider blei brukt som innseglingsmerke. Du ser fjellet frå langt ute i havet. I tillegg er det også frå gammalt av eit vermerke og ein vervarslar. Har Siggjo «hatt» på, blir det gjerne regn etterpå.
Varierte Bømlo
Landskapet er svært variert. Berrt, med blankskurte berg som på Slåtterøy, skogkledd og frodig som Totlandsskogen på Moster, og røft ut mot havet som ved Brandasund.
Bømlo består av mange øyer og holmar, og er landfast med Bømlabrua til Stord og Bømlafjordtunnelen som går vidare til Sveio (Trekantsambandet). Den bilfrie øya Espevær høyrer også til kommunen. Espevær har både «UFO-ring», kabelferje, sesongrestaurant og Hummarpark og er vel verdt eit besøk.
Bømlo er eit eldorado for padling og båtturistar, der alle øyene, Røyksundkanalen og Kulleseidkanalen gir gode opplevingar tett på naturen. Her er gode gjestehamner, og Kulleseidkanalen Gjestehamn byr også på gode matopplevingar og kulturopplevingar. Det er hotell på Bømlo. Rorbuer er også populært for ferierande. Gullvegen Gardstun tilbyr unik overnatting i Stormhytter heilt ute ved havet.
Historiske Bømlo
Blant dei mange øyene på Bømlo har Moster ei lang historie. Det var her Olav Tryggvason i år 995 gjekk først i land for å kristne Norge og ta kongsmakta. I 1024 blei kristenretten vedteke i Mostratinget på Moster. Arven frå Olav Haraldsson, som var sentral her, har stor betydning for korleis staten Norge vart.
Mostraspelet «I slik ei natt», som blir framført i Moster Amfi annakvart år i pinsehelga levandegjer dei historiske hendingane.
På Moster ligg også ei av dei eldste kyrkjene på Vestlandet, Moster gamle kyrkje.
Gullgruvene på Lykling representerer eit gullrush utan sidestykke i Norge som utspann seg på slutten av 1800-talet. No kan du oppleve området på flotte turstiar.
Reise til Bømlo
Du kjem det lett til Bømlo. Hurtigbåten frå Bergen har anløp på Rubbestadneset. Det går ferje mellom Buavåg i Sveio til Langevåg.Med bil er Bømlo knytt til fastland med bruer og Bømlafjordtunnelen. Handelssentrum på Bømlo er Svortland. Her er tettstadene Langevåg, Moster, Rubbestadneset, Finnås.